Agid online: Dumondas e respostas

Quest eConto As pussibilitescha in access segir a las prestaziuns digitalas da las autoritads dal chantun Grischun. Vus survegnis access a Voss profil persunal, a la chascha postala sco er a l'archiv da documents.

Sche Vus avris in eConto, pudais Vus utilisar servetschs che premettan tschertas indicaziuns persunalas u che pretendan in pli aut stgalim da confidenza. Las persunalias ch'èn arcunadas en Voss profil, vegnan – sche pussaivel – surpigliadas automaticamain per ils singuls servetschs. Ultra da quai survegnis Vus, cun il eConto, ina chascha da brevs digitala. Las funcziunalitads vegnan extendidas cuntinuadamain.

Na, Vus pudais avrir gratuitamain in eConto. Tscherts servetschs pudais Vus dentant utilisar – sco gia oz al spurtegl – er en il spazi digital mo cun pajar ina taxa.

Na. Ina gronda part dals servetschs è utilisabla senza in eConto. Per utilisar ils servetschs ch'èn marcads cun in simbol da marschlos stuais Vus As registrar. Quai, perquai che l'utilisaziun da quests servetschs premetta tschertas indicaziuns persunalas u pretenda in pli aut stgalim da confidenza.

Vossas datas vegnan arcunadas ed elavuradas entaifer l'administraziun chantunala e betg surdadas a terzas persunas. I vegnan duvradas mo las datas ch'èn necessarias per exequir in tschert servetsch.

Il ePortal ademplescha auts standards da segirezza ed ha lieus d'arcunaziun segirs. Per l'administraziun chantunala dal Grischun è la protecziun da las datas persunalas d'ina impurtanza centrala. Nus dumandain uschè paucas datas sco pussaivel e duvrain mo quellas datas ch'èn er effectivamain necessarias per in tschert servetsch.

Nus controllain, quant bain che Vossas datas ston vegnir protegidas e faschain – en cas da basegn – in concept da segirezza. Expertas ed experts fan cuntinuadamain tests, sch'ils servetschs digitals e l'infrastructura dad IT han flaivlezzas, quai per garantir, che nagin n'haja nunautorisadamain access a Vossas datas.

La gronda part dals servetschs digitals vegn arcunada entaifer l'administraziun chantunala dal Grischun. Singuls servetschs vegnan furnids da purschiders externs; cun quels ha l'administraziun chantunala dal Grischun fatg cunvegnas contractualas che garanteschan in aut standard da la protecziun da datas.

In eConto po vegnir creà en mintga vegliadetgna. La gronda part da las fatschentas d'autoritads èn dentant pussaivlas pir cun 18 onns.

In eConto n'ha nagina data da scadenza e resta valaivel uscheditg ch'el vegn utilisà. Sch'in eConto n'è betg vegnì duvrà durant 2 onns, vegn el deactivà. Suenter ulteriurs 2 onns senza far diever dad el vegn el stizzà.

Sche Vus vulais laschar bloccar Voss eConto, As drizzai per plaschair a noss support. Per quest intent pudais Vus emplenir ina dumonda da support u ans cuntanscher per telefon sut il numer 081 553 35 55.

Sche Voss eConto è vegnì bloccà da l'administraziun chantunala, survegnis Vus ina infurmaziun correspundenta per e-mail. En il e-mail chattais Vus in link al formular per debloccar il eConto. Sche Vus emplenis ed inoltrais quest formular, prenda l'administraziun chantunala si contact cun Vus.

Vus pudais stizzar Voss eConto da tut temp sin il ePortal. Giai sin Voss profil d'utilisaziun sin «Stizzar il eConto» e confermai la procedura. Il giavisch vegn arcunà ed il eConto vegn stizzà entaifer paucs dis.

Las infurmaziuns en Voss eConto ed en Vossa chascha da brevs digitala vegnan stizzadas.

Per avrir Voss eConto pudais Vus tscherner in num d'utilisaziun. Ils champs obligatorics èn: num uffizial (sco en il passaport u sin la carta d'identitad), adressa dad e-mail, data da naschientscha, num d'utilisaziun e pled-clav, numer da telefonin. Vus pudais er As registrar cun la SwissID u cun l'app AGOV.

Il eConto pretenda in'autentificaziun da dus facturs. Per avrir in eConto duvrais Vus l'access a Voss conto dad e-mail ed als messadis SMS da Voss telefonin, per che Vus possias survegnir ed endatar ils codes da conferma. Suenter pudais Vus tscherner sez en Voss eConto sut «Meds d'autentificaziun», sche Vus vulais duvrar per logins futurs in'adressa dad e-mail, il numer da telefonin u in'app d'autentificaziun sco segund factur.

Il chantun Grischun verifitgescha l'identitad da l'utilisadra u da l'utilisader cun in partenari extern certifitgà. Quest proceder è cumparegliabel cun la verificaziun da l'identitad che vegn fatga per avrir in conto da banca. Plinavant vegn il numer AVS verifitgà sur l'Uffizi central da cumpensaziun UCC da la Confederaziun.

Actualmain è la gronda part dals servetschs en il ePortal accessibla ubain senza annunzia ubain cun in eConto sin il stgalim da confidenza il pli bass. La purschida da servetschs en il ePortal vegn dentant extendida cuntinuadamain. Per tscherts servetschs vegn il stgalim da confidenza mesaun u suprem ad esser necessari en l'avegnir. Tgi che ha cuntanschì il stgalim da confidenza suprem, dispona d'ina identitad electronica resistenta – quai è ina cumprova d'identitad segira en il spazi digital da l'administraziun chantunala dal Grischun.

As annunziai en il ePortal e cumenzai il process en Voss profil directamain sur il menu «Auzar il stgalim da confidenza».

• Il stgalim da confidenza il pli bass survegnis Vus automaticamain cun la registraziun.

• Per cuntanscher il stgalim da confidenza mesaun, dovri ina identificaziun per video. Per quella duvrais Vus in document d'identitad valaivel (p.ex. la carta d'identitad u il passaport) e Voss telefonin, per pudair far ina registraziun da video da Vossa fatscha.

• Per cuntanscher il stgalim da confidenza suprem, dovri l'indicaziun da Voss numer AVS. Quel vegn cumpareglià cun il Register naziunal da la AVS. Voss numer AVS chattais Vus per exempel sin Vossa carta da l'assicuranza da malsauns.

Ils documents d'identitad valaivels èn il passaport svizzer, la carta d'identitad svizra ed auters documents d'identitad tenor la Glista da pajais.

La SwissID è ina identitad digitala svizra ch'As permetta da autentifitgar per utilisar servetschs digitals en moda segira. Pudais As registrar cun SwissID ed utilisar quella per logins sin il eConto.

Sche Vus avris Voss eConto cun SwissID, Vossas datas persunalas vegnan transmittidas en moda segira. Vus pudais suenter identifitgar Voss profil persunal ed utilisar ils servetschs digitals dal chantun.

Il servetsch d'autentificaziun AGOV è ina procedura d'annunzia moderna e segira che funcziuna senza pled-clav e che permetta a las utilisadras ed als utilisaders da s'annunziar tar differentas purschidas online da la Confederaziun, dals chantuns e da las vischnancas. AGOV è in project da l'Administraziun digitala Svizra, in'organisaziun che cumpiglia la Confederaziun, ils chantuns e las vischnancas.

Sche Vus n'avais anc betg in AGOV-login, pudais Vus As registrar sin AGOV. Per far quai duvrais Vus Voss smartphone. Nus As recumandain da duvrar er per AGOV l'adressa dad e-mail che Vus utilisais per il eConto dal ePortal da l'administraziun chantunala dal Grischun.

Sche Vus vulais As annunziar cun Voss AGOV-login en il eConto dal ePortal da l'administraziun chantunala dal Grischun, cliccais Vus sin «S'annunziar». Ina mascra d'annunzia cumpara. Giusum la mascra chattais Vus il buttun «agov.ch». Cliccai sin quel e lura vegnis Vus dirigida resp. dirigì tras la procedura d'annunzia AGOV. Cuntrari ad autras pussaivladads da login na dovran las utilisadras ed il utilisaders d'in AGOV-login nagin num d'utilisaziun, nagin pled-clav ed eventualmain er nagin segund factur pli. La procedura da login vegn fatga sur l'app AGOV. Il sistem è segir ed a medem temp facil d'utilisar.

En las proceduras da login usitadas duvrais Vus in num d'utilisaziun ed in pled-clav, eventualmain er anc in segund factur. Tar AGOV percunter remplazzan l'app AGOV sin il smartphone u ina clav da segirezza fisica (Fast Identity Online, num curt: «FIDO-stick») il num d'utilisaziun ed il pled-clav, inclusiv segund factur, ch'èn usitads fin ussa. Il sistem è segir ed a medem temp facil d'utilisar.

La colliaziun dal AGOV-login cun Voss eConto da l'administraziun chantunala dal Grischun vegn fatga automaticamain tar l'emprima annunzia cun AGOV en il ePortal. Guardai che Vus endateschias en Voss conto AGOV la medema adressa dad e-mail sco en Voss eConto. Uschiglio stuais Vus adattar quella sin AGOV.

Er sche Vus essas gia registrada resp. registrà sin AGOV cun ina fotografia da Vossa fatscha cun Voss smartphone, cun in document d'identitad e cun il numer AVS, èsi – per motivs da segirezza – er anc necessari da far ina registraziun sur ils trais differents stgalims da confidenza en Voss eConto dal ePortal da l'administraziun chantunala dal Grischun.

Il pievel svizzer ha acceptà la fin da settember 2025 il project per emetter ina cumprova electronica statala da l'identitad, l'uschenumnada E-ID. En l'avegnir vegn ella a permetter da cumprovar cun vigur legala l'identitad en il spazi digital. La E-ID vegn a vegnir emessa da la Confederaziun e vegn ad esser valaivla en l'entira Svizra. Uschespert che la E-ID è disponibla, vegn er il Grischun a porscher la E-ID sco opziun d'annunzia per il eConto da l'administraziun chantunala.

L'identitad electronica resistenta è ina cumprova d'identitad segira en il spazi digital da l'administraziun chantunala dal Grischun. Tut tenor tge servetsch che Vus vulais utilisar, duvrais Vus questa cumprova d'identitad. Uschespert che Vus selecziunais in tal servetsch, vegnis Vus manads correspundentamain tras la controlla d'identitad. Sche Vus avais gia l'identitad electronica resistenta, pudais Vus utilisar directamain il servetsch respectiv.

L'identitad electronica resistenta cun agid dal eConto vegn duvrada per utilisar ils servetschs digitals che vegnan purschids sin il ePortal da l'administraziun chantunala dal Grischun. Ella po plinavant vegnir utilisada per servetschs da vischnancas che vegnan purschids entaifer il chantun Grischun. Pli tard vegn la Confederaziun a metter a disposiziun la E-ID. Questa identitad electronica renconuschida dal stadi vegn a permetter da cumprovar cun vigur legala l'identitad en il spazi digital. Ella vegn emessa da la Confederaziun e vegn ad esser valaivla en l'entira Svizra.

Sche Vus avais in problem cun fotografar Voss document d'identitad, faschai attenziun ch'in det u objects na cuvrian betg il document en il sectur marcà. Controllai, che naginas glischs u reflecziuns na disturbian la fotografia, e che Voss document d'identitad saja net e bain legibel. Muventai Voss document durant fotografar in pau enavant ed enavos e faschai attenziun che Vus hajas prendì la vart correcta (vart davant resp. vart davos) dal document. Sch'i na funcziuna tuttina betg da far la fotografia, contactai noss support. Vus pudais ubain far ina dumonda da support sur il formular ubain contactar il support da tuttas uras per telefon sut il numer 081 553 35 55.

Sche Vus avais problems cun l'identificaziun per video, controllai, che Vus hajas avunda glisch d'ambient ed empruvai d'evitar moviments svelts. Faschai attenziun da na purtar nagins accessoris che cuvran la fatscha (p.ex. egliers da sulegl, cuvridas-chau, uregliers). Controllai en Voss eConto Vossas datas persunalas, sco il num e la data da naschientscha. Il prenum ed il num da famiglia ston vegnir endatads cumplettamain ed en la medema scripziun sco sin il document d'identitad. Sche l'identificaziun na funcziuna tuttina betg, contactai noss support. Vus pudais ubain far ina dumonda da support sur il formular ubain contactar il support da tuttas uras per telefon sut il numer 081 553 35 55.

Sche Vus avais problems cun la controlla da Voss numer AVS, controllai che Vus hajas endatà correctamain il numer. El sto avair 13 cifras e cumenzar cun la retscha da cifras 756. Sche la controlla na funcziunass tuttina betg, contactai noss support. Vus pudais ubain far ina dumonda da support sur il formular ubain contactar il support da tuttas uras per telefon sut il numer 081 553 35 55.

En cas da problems cun il AGOV-login As stattan a disposiziun infurmaziuns utilas sut AGOV help. Sch'il AGOV-login na funcziuna tuttina betg en il eConto dal ePortal da l'administraziun chantunala dal Grischun, contactai per plaschair noss support. Per quest intent pudais Vus emplenir ina dumonda da support u telefonar a nus sut il numer 081 553 35 55.

Sche Vus avais emblidà Voss num d'utilisader, contactai per plaschair noss support. Vus pudais ubain far ina dumonda da support sur il formular ubain contactar il support da tuttas uras per telefon sut il numer 081 553 35 55.

Cliccai sin la mascra d'annunzia sin «Emblidà il pled-clav» ed endatai Voss numer da telefonin. Suenter survegnis Vus in code da conferma sin Voss telefonin. In segund code da conferma vegn tramess a Vossa adressa dad e-mail. Suenter pudais Vus fixar in nov pled-clav per Voss e-conto.

Cliccai sin «Nov numer?» en il segund pass da la mascra d'annunzia. Suenter As vegn tramess in code da conferma a Vossa adressa dad e-mail. Suenter suandais Vus las instrucziuns per endatar in nov numer da telefonin.

Cliccai sin «Pers l'access?» en il segund pass da la mascra d'annunzia. Suenter As vegn tramess in code da conferma per SMS sin Voss numer da telefonin. Suenter suandais Vus las instrucziuns per endatar ina nova adressa dad e-mail.

Sche Vus n'avais betg survegnì in code da conferma sin Vossa adressa dad e-mail, controllais Vus, sch'il messadi n'è betg forsa arrivà en l'ordinatur da spam. Sche Vus n'avais betg survegnì in code per SMS, contactai per plaschair noss support. Vus pudais ubain far ina dumonda da support sur il formular ubain contactar il support da tuttas uras per telefon sut il numer 081 553 35 55.

Controllai che Vus n'hajas betg dumandà plirs codes in suenter l'auter. Spetgai in pèr minutas, avant che Vus dumandais in nov code e guardai che Vus dovrias l'ultim code che Vus avais survegnì. Sche quai na funcziuna betg, contactai noss support. Vus pudais ubain far ina dumonda da support sur il formular ubain contactar il support da tuttas uras per telefon sut il numer 081 553 35 55.

Sche Vus survegnis l'annunzia d'in sbagl, empruvai l'emprim d'avrir danovamain la pagina. Sche quai na gida betg, stizzai ils cookies en Voss browser. Avri per quest intent las configuraziuns da Voss browser e selecziunai «Protecziun da datas» u «Segirezza».